TTAK-en eskutik Ainhoa Larrañagarekin elkarrizketa DBH 4ko ikasleek

Arrasateko Gaztetxean izan dira, urtero bezala, Arrasateko DBH 4ko ikasleak, eta aurten Ainhoa Larrañaga aktore eta abeslariarekin elkarrizketa izateko aukera bikaina izan dute. Ainhoak, bere gaztetasunetik eta hurbiltasunetik, euskararen inguruko hausnarketa interesgarriak eskaini dizkie ikasleei, bere ibilbide artistikoan hizkuntzak duen garrantzia azpimarratuz.
Euskaraz haratago, gaur egungo gizarteak eta bereziki gazteek aurrez aurre dituzten beste gai garrantzitsu batzuk ere jorratu ditu Ainhoak: emakumeen egoera sorkuntzan eta lanean, ibilbide alternatiboen aukerak, euskararen egoera gazteen artean eta komunikabideetan…
Saioa elkarrizketa eta parte-hartze dinamikoen bidez garatu dute TTAK-eko kideek, eta ikasleek galderak egiteko eta gogoeta sakonak egiteko tartea izan dute. Ainhoak, bere bizipenetatik eta sormenaren munduan duen ikuspegitik, gazteen artean motibazioa eta autoestimua pizteko ahalegin berezia egin du, euren bidea egiteko animatuz.
Eskerrik asko Ainhoa Larrañagari bere prestutasunagatik eta ekitaldia antolatzen lagundu duten TTAK-eko kide guztioi, ekimen aberasgarri honen bidez euskararen, berdintasunaren eta gizarte kontzientziaren hazia ereiteagatik.