Badatoz Arizmendi Ikastolako udalekuak!

Uda iristeko gero eta gutxiago falta den honetan, udalekuak ate joka ditugu. Azken ikasturteetan bezala, ikasturte honetan ere, Arizmendi Ikastolan Udalekuetako izen ematea zabaldu dugu; 15 txanda antolatuko ditugu, ekainaren 27an hasi eta uztailaren 14an bitartean.

Euskal Herriko toki ezberdinetan izango dira Udalekuak; Garesen, Beran, Vianan, Lekeition, Otsagin, Belaguan eta Ibiltaria (3 Haundiak), hain zuzen ere. Bertan izena emateko aukera izan dute HH5 urteko ikasleetatik hasi eta DBH 4. mailara arteko ikasleek. Hauetaz gain, Batxilergoan dugun monitore eskolakoek ere, beraien irteera profila aberasteko asmoz, aukera izango dute lehen aldiz hezitzaile rola betetzeko, gure Ikastolako irakasle eta ikasle ohi batzuen laguntzaz. 

Udalekuak esperientzia ezin hobea dira gure ikasleentzat, aukera izaten dutelako aisialdi euskaldun eta hezitzaileaz gozatzeko, naturak eskaintzen dizkigun aukera askotarikoak aprobetxatuz; mendian, erreketan eta itsasoan bizipen desberdinak bizitzeko, herri desberdinak ezagutzeko, euskal kulturan murgiltzeko, lagun berriak egiteko, gaubelez gozatzeko… Udaleku bakoitzak bere egitaraua izango du, ikasleen adinera egokituta egongo dena. Eta nola ez, ikasleak izango dira udalekuetako protagonista nagusiak.

Antolatzaileak irrikan gaude garaia iristeko. Ziur primeran pasatuko dugula!

Eskerrik asko izena eman duzuen guztioi! Zuek gabe ezinezkoa izango litzateke horrelako esperientzia aberasgarriak bizitzea. Biba zuek! Laster arte!