Liburuaren Nazioarteko Egunaren harira, liburuen magiaz bete dira ERDU eta GURA egitasmoetako guneak

Apirilaren 23a data borobila da kultura eta literatura munduan, Liburuaren Nazioarteko Eguna ospatzen baita mundu osoan. Arizmendi Ikastolan ere ez dugu aukera pasatzen utzi nahi izan, eta aste osoan zehar irakurketa izan da protagonista nagusia gure ERDU eta GURA guneetan. Ikasle, irakasle zein familiak liburuen mundu amaigabean murgildu dira, irakurketari tarte berezia eta pausatua eskainiz. Ikastolako gelak zein kanpo-espazioak istorioz, abenturaz eta irudimenez bete dira, liburu baten orrialdeak irekitzea leiho berri bat zabaltzea dela gogoraraziz.

Ospakizun honen bidez, gure Ikastolan hainbat helburu pedagogiko eta kultural landu nahi izan ditugu ikasleekin modu integralean. Alde batetik, irakurzaletasuna sustatu nahi izan dugu, irakurketa gozamen iturri gisa aurkeztuz nerabe eta haurrengan ohitura hori indartzeko. Bestetik, industria editoriala bultzatzearen garrantzia eta egile eskubideen bitartez jabetza intelektuala babestearen beharra azpimarratu dira, sortzaileen lana errespetatzea funtsezkoa baita gure kulturak bizirik jarrai dezan.

Irakurketa aste hau, gainera, Juul kanpainarekin lotu dugu gure guneetan. Ekimen honen baitan, hainbat ipuinen kontaketak egin dira eta, ondoren, ikasleek euren gustukoenak aukeratzeko aukera izan dute. Lanketa hau bereziki aberasgarria izan da gune batzuetan, ipuin kontaketak hizkuntza desberdinetan egin baitira, gure komunitatearen aniztasuna liburuen bidez ere balioan jarriz.

Irakurketa ez da soilik tresna akademiko bat; mundua ulertzeko, enpatia lantzeko eta norberaren sormena garatzeko giltza nagusia da. Aste honetan ERDU eta GURA guneetan egindako lanketak gure ikasleengan hazitxo hori indartzen jarraitzea du helburu, liburuekiko lotura bizitza osorako bidelagun izan dezaten.

Jarraian ikus ditzakezue gune bakoitzean irakurketaren aste honek eman dituen irudiak:

Olarte

Uribarri

Santa Teresa

Basabeazpi

Almen